উত্তেজনা তুংগত থকাৰ মাজতে ইজৰাইলত ইৰাণৰ ক্ষেপণাস্ত্ৰৰ আঘাত: মোছাদৰ কাৰ্য্যালয় ধ্বংস, হতাহত, আৰু সংঘাত ঐতিহাসিকভাবে বৃদ্ধি

বিধ্বংসী আক্ৰমণ আৰু ধ্বংস

মঙলবাৰে অতি পুৱাৰ ভাগত ইৰাণৰ ৰিভল্যুচনেৰী গাৰ্ডে টেল আভিভ আৰু হাইফাকে ধৰি ইজৰাইলৰ বিভিন্ন চহৰক লক্ষ্য কৰি ক্ষেপণাস্ত্ৰ নিক্ষেপ কৰে । এই আক্ৰমণত ইজৰাইলৰ সামৰিক ঘাটি আৰু অসামৰিক অঞ্চলক লক্ষ্য কৰি লোৱা হয় । এটাৰ পিছত আনটোকৈ ধাৰাবাহিকভাৱে নিক্ষেপ কৰা 200 ক্ষেপণাস্ত্ৰৰ প্ৰায় 90 শতাংশই লক্ষ্যত আঘাত কৰে বুলি ইৰাণৰ ৰিভল্যুচনেৰী গাৰ্ডে দাবী কৰিছে । প্ৰতিবেদনসমূহে নিশ্চিত কৰিছে যে ক্ষেপণাস্ত্ৰৰ আক্ৰমণত কেইবাটাও আৱাসিক অট্টালিকা ধ্বংস হৈছে । উদ্ধাৰকাৰী দলে ধ্বংসাৱশেষৰ মাজত উদ্ধাৰ কাৰ্য্য চলোৱাৰ লগে লগে মৃত্যুৰ সংখ্যা বৃদ্ধি পাইছে । সমগ্ৰ ইজৰাইলৰ চিকিৎসালয়সমূহ হতাহত লোকৰ আগমনৰ ফলত এক অভূতপূৰ্ব পৰিস্থিতিৰ সৃষ্টি হৈছে । কিছুমান অঞ্চলৰ বিদ্যুৎ গ্ৰীড গুৰুতৰভাৱে বিঘ্নিত হৈছে । জটিল আন্তঃগাঁথনিৰ ক্ষতি সম্পূৰ্ণৰূপে মেৰামতি কৰিবলৈ কেইবামাহো নহ’লেও কেইবা সপ্তাহো লাগিব বুলি আশা কৰা হৈছে । আলজাজিৰা নিউজ চেনেলত প্ৰকাশ পোৱা তথ্য অনুসৰি ইৰাণৰ ৰিভল্যুচনেৰী গাৰ্ড কয় যে গাজা আৰু লেবাননৰ লোকৰ ওপৰত ইজৰাইলে চলোৱা আক্ৰমণৰ প্ৰত্যুত্তৰ দিবলৈ এই আক্ৰমণ কৰা হৈছে ।

প্ৰাৰম্ভিক প্ৰতিবেদন অনুসৰি ৫০ জনতকৈ অধিক ইজৰাইলী নাগৰিকে প্ৰাণ হেৰুৱাইছে, আৰু শ শ লোক আহত হৈছে। ইজৰাইলৰ আইৰণ ড’ম প্ৰতিৰক্ষা ব্যৱস্থাই বহু ক্ষেপণাস্ত্ৰ আকাশতে ধৰা পেলাই ধ্বংস কৰিছিল যদিও কেইবাটাও ক্ষেপণাস্ত্ৰই সুৰক্ষামূলক ঢাল ভেদ কৰি ব্যাপক ক্ষতিসাধন কৰিবলৈ সক্ষম হৈছিল।

চি এন এনৰ বাতৰি অনুসৰি ইৰাণে ইটোৰ পিছত সিটোকৈ 200 ক্ষেপণাস্ত্ৰৰে সমগ্ৰ ইজৰাইলৰ গৰুত্বপূৰ্ণ স্থানসমূহক লক্ষ্য কৰি আক্ৰমণৰ চলায় । এই আক্ৰমণৰ ফলত দুয়ো দেশৰ মাজত শত্ৰুতা অত্যধিক তীব্ৰতৰ হৈছে । আক্ৰমণৰ ফলত ইজৰাইলৰ যথেষ্ট ধ্বংস হৈছে আৰু এই আক্ৰমণে অঞ্চলটোৰ ভৱিষ্যতৰ সুস্থিৰতাকলৈ উদ্বেগ বৃদ্ধি পাইছে ।

গভীৰভাবে শিপাই থকা সংঘাতৰ ইতিহাস

এই ক্ষেপণাস্ত্ৰ আক্ৰমণ ইৰাণ আৰু ইজৰাইলৰ মাজত দীৰ্ঘদিনীয়া উত্তেজনাৰ এক উল্লেখযোগ্য অধ্যায় হিচাপে চিহ্নিত হৈছে, যিটো মতাদৰ্শগত, ৰাজনৈতিক আৰু ভূখণ্ডৰ বিবাদকে ধৰি সংঘাতৰ এক সামূহিক ফলশ্ৰুতি । ১৯৭৯ চনৰ ইৰাণ বিপ্লৱৰ পিছৰে পৰা যেতিয়া ইৰাণৰ শাসন ব্যৱস্থা ঈশ্বৰতান্ত্ৰিক শাসন ব্যৱস্থালৈ সলনি হৈছিল, তেতিয়াৰ পৰাই দুয়োখন দেশৰ মাজত এক শীতল যুদ্ধত চলি আহিছিল আৰু সঘনাই সমগ্ৰ মধ্যপ্ৰাচ্যতে প্ৰক্সি যুদ্ধত লিপ্ত হৈ আহিছে ।

এই সংঘাতৰ মূলতে আছে ইজৰাইলৰ প্ৰতি শত্ৰুতাপূৰ্ণ উগ্ৰপন্থী গোট যেনে হিজবুল্লাহ আৰু হামাছৰ প্ৰতি ইৰাণৰ সমৰ্থনৰ লগতে ইৰাণৰ পাৰমাণৱিক সামৰ্থ্য অৰ্জন, যিটো ইজৰাইলৰ দৃষ্টিত ইজৰাইলৰ প্ৰতি এক অস্তিত্বৰ ভাবুকি । বছৰ বছৰ ধৰি ছিৰিয়াত থকা ইৰাণৰ সামৰিক ঘাটি সমূহত ইজৰাইলৰ বিমান আক্ৰমণ আৰু ইজৰাইলৰ বিৰুদ্ধে ইৰাণৰ অটল স্থিতিয়ে অঞ্চলটোক অহৰহ উত্তেজনাৰ অৱস্থাত ৰাখিছে ।
শেহতীয়াকৈ এই আক্ৰমণ সংঘটিত হৈছে ইৰাণে কৌশলগত ঘেৰাও হিচাপে গণ্য কৰা আব্ৰাহাম চুক্তিৰ জৰিয়তে আৰব ৰাষ্ট্ৰসমূহৰ সৈতে ইজৰাইলে লোৱা কূটনৈতিক পদক্ষেপৰ পিছত ইৰাণৰ আক্ৰমণাত্মক বাক্যবাণৰ মাজতে ।

আঞ্চলিক স্থিতিশীলতাৰ বাবে প্ৰভাৱ

এই ক্ষেপণাস্ত্ৰ আক্ৰমণে দুয়োখন শক্তিৰ মাজত সৰ্বাত্মক যুদ্ধৰ আশংকা জগাই তুলিছে । চি এন এনৰ বাতৰিত প্ৰকাশ যে বেঞ্জামিন নেতান্যাহুয়ে ইৰাণে এই আক্ৰমণৰ অতি বিষম ফল ভূগিব লাগিব বুলি প্ৰতিক্ৰিয়া প্ৰকাশ কৰিছে । ইজৰাইলে প্ৰতিশোধমূলক সামৰিক অভিযানৰ প্ৰস্তুতি চলোৱাৰ বাতৰি পোৱা গৈছে । লেবানন, ছিৰিয়াৰ দৰে চুবুৰীয়া ৰাষ্ট্ৰসমূহক আগুৰি ধৰিব পৰা ব্যাপক সংঘাতৰ সম্ভাৱ্য সৰ্পিল গতিৰ বিষয়ে বিশ্লেষকসকলে সতৰ্ক কৰি দিছে যে । আশংকা কৰা হৈছে যে আনকি এই সংঘাতে বিশ্বৰ মহাশক্তিসমূহকো আকৰ্ষণ কৰিব পাৰে কাৰণ ইৰাণৰ সপক্ষত ৰাছিয়া আৰু ইজৰাইলৰ সমৰ্থনত আমেৰিকাৰ দৰে মহা শক্তিধৰ দেশ সমূহ আছে । ইৰাণ সমৰ্থিত উগ্ৰপন্থী সংগঠন সমূহৰ জড়িত হৈ পৰাটোৱে মধ্যপ্ৰাচ্যৰ ভংগুৰ শান্তি আৰু অধিক অস্থিৰ কৰি তুলিব পাৰে ।
তদুপৰি এই উত্তেজনা বৃদ্ধিয়ে বিশেষকৈ আব্ৰাহাম চুক্তিৰ প্ৰেক্ষাপটত শেহতীয়া বছৰবোৰত লাভ কৰা তথা সহজে ভাঙি যাব পৰা কূটনৈতিক অগ্ৰগতিৰ প্ৰতি ভাবুকি কঢ়িয়াই আনিব পাৰে । দীৰ্ঘদিনীয়া সামৰিক সংঘাতে শান্তি প্ৰতিস্থাৰ প্ৰচেষ্টাত গুৰুতৰভাৱে বাধাৰ সৃষ্টি কৰিব আৰু অঞ্চলটোৰ কৌশলগত গুৰুত্বৰ প্ৰতি লক্ষ্য ৰাখি বিশ্বৰ শক্তিৰ বজাৰত ইয়াৰ ব্যাপক প্ৰভাৱ পৰিব পাৰে।

ভৱিষ্যতৰ সম্ভাৱনা: হিংসাৰ প্ৰত্যাৱৰ্তন ?

আমেৰিকা আৰু ৰাছিয়াকে ধৰি আন্তঃৰাষ্ট্ৰীয় শক্তিসমূহে সংযমৰ আহ্বান জনাইছে যদিও ইৰাণ-ইজৰাইল সংঘাতৰ ভৱিষ্যত অনিশ্চিত হৈ আছে । দুয়োখন দেশৰ মাজত যিকোনো শান্তি আলোচনা ঐতিহাসিকভাৱে দূৰৰ সপোনৰ দৰে হৈ আহিছে আৰু ধ্বংসৰ সংখ্যা বৃদ্ধি পোৱাৰ লগে লগে পুণ সু-সম্পৰ্ক স্থাপনৰ পথটো পূৰ্বতকৈ অধিক দূৰলৈ আঁতৰি গৈছে যেন লাগে ।

শেহতীয়াকৈ সৃষ্টি হোৱা এই হিংসাত্মক পৰিস্থিতিয়ে ইৰাণ আৰু ইজৰাইলৰ মাজত গভীৰভাৱে শিপাই থকা শত্ৰুতাক প্ৰতিফলিত কৰাই নহয়, তেওঁলোকৰ শত্ৰুতাৰ সুদূৰপ্ৰসাৰী প্ৰভাৱকো উজ্জ্বল কৰি তুলিছে। সম্প্ৰতি অঞ্চলটো আৰু বিশ্বই উদ্বিগ্নতাৰে অপেক্ষা কৰি আছে যে এই ক্ষেপণাস্ত্ৰৰ নিক্ষেপ আৰু প্ৰতিনিক্ষেপ মধ্যপ্ৰাচ্যক এক নতুন ৰূপ দিব পৰা ব্যাপক, অধিক ধ্বংসাত্মক যুদ্ধত পৰিণত হ’ব নেকি।

আক্ৰমণৰ পিছতে ইজৰাইলৰ প্ৰধানমন্ত্ৰীয়ে নিৰ্ণায়কভাৱে প্ৰতিক্ৰিয়া প্ৰকাশ কৰাৰ প্ৰতিশ্ৰুতি দিছে । আনহাতে ইৰাণৰ নেতাসকলে এই আক্ৰমণক “জায়নিষ্ট আগ্ৰাসন”ৰ বিৰুদ্ধে জয় হিচাপে উদযাপন কৰিছে । দুয়োটা জাতিয়ে ইয়াৰ পিছত কি হ’ব তাৰ বাবে সাজু হৈ থকাৰ লগে লগে ইতিমধ্যে অস্থিৰতাৰে ভৰা অঞ্চলটোৰ ওপৰত যুদ্ধৰ ছাঁ ওলমি ৰৈছে ।

ইৰাণে ইজৰাইলৰ ওপৰত কৰা ক্ষেপণাস্ত্ৰ আক্ৰমণে দশক দশক ধৰি চলি অহা শত্ৰুতাৰ দকৈ শিপাই থকা তেওঁলোকৰ উতলি থকা সম্পৰ্কলৈ আঙুলিয়াই দিয়ে। এই শেহতীয়া আগ্ৰাসনৰ প্ৰতিক্ৰিয়া তেওঁলোকৰ সীমাৰ বহু বাহিৰত অনুভৱ হোৱাৰ সম্ভাৱনা আছে এইটো বিশ্বই নিৰিক্ষণ কৰি আছে। ইয়াৰ দ্বাৰা বৃহত্তৰ সংঘাতৰ আৰম্ভণি হয় নে হিংসাৰ অন্তহীন যেন লগা চক্ৰৰ ধাৰাবাহিকতা হ’ব সেয়া হ’ব লক্ষ্যণীয়।