ভাৰতীয় জনতা পাৰ্টিৰ সদস্য বিষ্ণু দেউ ছাইক ২০২৩ চনৰ বিধান সভা নিৰ্বাচনত দলটোৰ বিপুল বিজয়ৰ পিছত ছট্টিশগড়ৰ নতুন মুখ্যমন্ত্ৰী হিচাপে নিৰ্বাচিত কৰা হৈছে। সদ্য সম্পন্ন বিধান সভা নিৰ্বাচনত ৰাজ্যৰ বিধানসভাৰ ৯০খন আসনৰ ভিতৰত ৫৪খন আসন দখল কৰি বিজেপিয়ে ছট্টিশগড়ত উল্লেখযোগ্য জয় নিশ্চিত কৰে।
ৰায়পুৰত দলৰ ৫৪ গৰাকী নৱনিৰ্বাচিত বিধায়কৰ উপস্তিতিত হোৱা বৈঠকৰ অন্তত বিষ্ণু দেউ ছাইক মুখ্যমন্ত্ৰী হিচাপে নিৰ্বাচিত হোৱাৰ কথা ঘোষণা কৰা হয়। ছাইয়ে ‘মোডী কী গ্যাৰাণ্টী’ৰ অধীনত ছট্টিশগড়বাসীক দিয়া প্ৰতিশ্ৰুতি পূৰণৰ প্ৰতি দায়বদ্ধতা প্ৰকাশ কৰি নাগৰিকসকলৰ মাজত আস্থা (‘সবকা বিশ্বাস’) গঢ়ি তোলাৰ বাবে নিজৰ নিষ্ঠাৰ ওপৰত গুৰুত্ব আৰোপ কৰে।
News18ৰ বাতৰি মতে এই ঘোষণাৰ পিছত সংবাদ মাধ্যমৰ সৈতে হোৱা প্ৰথম বাৰ্তালাপত ছাইয়ে প্ৰতিশ্ৰুতি দি কয় যে ৰাইজক ১৮ লাখ ‘আৱাছ’ (ঘৰ) প্ৰদানক অগ্ৰাধিকাৰ দিয়া হ’ব । কাৰ্যভাৰ গ্ৰহণ কৰাৰ লগে লগে ইয়াক তেওঁৰ অন্যতম প্ৰাথমিক কাম হিচাপে চিহ্নিত কৰে।
৫৯ বছৰীয়া ছাই প্ৰাক্তন মুখ্যমন্ত্ৰী অজিত যোগীৰ পিছত ছট্টিশগড়ৰ প্ৰথমজন জনজাতীয় মুখ্যমন্ত্ৰী হিচাপে পৰিগণিত হ’ব। দুৰ্গ, ৰায়পুৰ, বিলাসপুৰ সংমণ্ডলত যথেষ্ট উপস্থিতিৰ বাবে পৰিচিত প্ৰভাৱশালী ছাই সাহু (তেলী) সম্প্ৰদায়ৰ।
১৯৯০ চনৰ আগৰ পৰাই তেওঁৰ গাঁৱত ছাইৰ ৰাজনৈতিক যাত্ৰা আৰম্ভ হৈছিল, য’ত তেওঁ বিনা প্ৰতিদ্বন্দ্বিতাৰে চৰ্পঞ্চ বা গাৱঁৰ মুখীয়াল হিচাপে নিৰ্বাচিত হৈছিল। ২০২০ চনৰ পৰা ২০২২ চনলৈ ছট্টিশগড়ৰ বাবে দলৰ ৰাজ্যিক সভাপতি হিচাপে কাৰ্যনিৰ্বাহ কৰি তেওঁ বিজেপিৰ বিশিষ্ট ব্যক্তিত্বৰ দায়িত্ব পালন কৰি আহিছে ।
ইয়াৰ পূৰ্বে নৰেন্দ্ৰ মোডী নেতৃত্বাধীন চৰকাৰত খনি আৰু তীখা বিভাগৰ কেন্দ্ৰীয় মন্ত্ৰীৰ পদত অধিষ্ঠিত হোৱা ছাইৰ ছট্টিশগড়ৰ প্ৰাক্তন মুখ্যমন্ত্ৰী ৰমন সিঙৰ সৈতে ঘনিষ্ঠ সম্পৰ্ক আছে।
২০২৩ চনৰ ছট্টিশগড় বিধানসভা নিৰ্বাচনত কুংকুৰিৰ পৰা জয়ী হোৱা ছাইয়ে ১৯৯৯, ২০০৪, ২০০৯, আৰু ২০১৪ চনত ৰায়গড় সমষ্টিৰ পৰা একেৰাহে চাৰিটা লোকসভা নিৰ্বাচনতো সফলতা অৰ্জন কৰিছিল ।