ভাৰতীয় প্ৰশাসিত কাশ্মীৰৰ শেহতীয়া এক পৰিঘটনাত সেনাৰ জিম্মাত থকাৰ সময়ত তিনিজন সাধাৰণ নাগৰিকৰ মৃত্যুৱে অঞ্চলটোত নতুন উত্তেজনাৰ সৃষ্টি কৰিছে । উল্লেখযোগ্য যে যোৱা সপ্তাহত সন্দেহযুক্ত উগ্ৰপন্থীৰ আক্ৰমণত চাৰিজন সেনা জোৱানৰ মৃত্যুৰ পিছত এই ব্যক্তিসকলক সোধা-পোছাৰ বাবে আটক কৰা হৈছিল । বিবিচিৰ বাতৰি অনুসৰি কাশ্মিৰৰ স্থানীয় লোকৰ অভিযোগ মতে এই লোক কেইজনৰ সেনাৰ জিম্মাত সেনা জোৱানৰ দ্বাৰা তীব্ৰ নিৰ্যাতনৰ বলি হৈ মৃত্যু হয় ।
সেনাৰ জিম্মাত হোৱা সাধাৰণ নাগৰিকসকলৰ মৃত্যুৰ সন্দৰ্ভত আৰক্ষীয়ে ইতিমধ্যে তদন্ত আৰম্ভ কৰিছে ।
এই ঘটনাৰ পিছতে ব্যাপক ক্ষোভ আৰু প্ৰতিবাদৰ সৃষ্টি হয় । জিম্মাত মৃত্যু হোৱা লোক কেইজনৰ পৰিয়ালৰ লোকে দাবী কৰা মতে মৃতদেহবোৰত চৰম নিৰ্যাতনৰ চিন দেখা পোৱা গৈছিল । ইয়াৰ লগতে ভাৰতীয় সেনাৰ জোৱানসকলে ব্যক্তিসকলৰ ওপৰত কৰা বুলি কোৱা অত্যাচাৰৰ এক ভিডিঅ’ ক্লিপ প্ৰচাৰ হোৱাত বিক্ষোভ আৰু অধিক তীব্ৰতৰ হৈ পৰিছে । অৱশ্যে এই ভিডিঅ’টোৰ সত্যতা বিবিচিকে ধৰি স্বতন্ত্ৰ সূত্ৰই পৰীক্ষা কৰি নিশ্চিত কৰা নই ।
পৰিস্থিতিৰ প্ৰতি সঁহাৰি জনাই প্ৰতিৰক্ষা মন্ত্ৰী ৰাজনাথ সিঙে কাশ্মীৰ ভ্ৰমণত নামি পৰে আৰু অঞ্চলটোৰ নিৰাপত্তা ব্যৱস্থাৰ তদাৰক আৰু মূল্যায়ন কৰে। ভ্ৰমণৰ সময়ত তেওঁ এই ঘটনাক লৈ উদ্বেগ প্ৰকাশ কৰি বিষয়টোৰ পুংখানুপুংখ তদন্তৰ বাবে প্ৰয়োজনীয় পদক্ষেপ গ্ৰহণ কৰা হৈছে বুলি আশ্বাস দিয়ে। ইয়াৰ উপৰিও তেওঁ উগ্ৰপন্থী আক্ৰমণত আহত জোৱানসকল সুস্থ হৈ উঠাৰ বাবে কামনা কৰে।
এই ভ্ৰমণ কালত বুধবাৰে প্ৰতিৰক্ষা মন্ত্ৰী ৰাজনাথ সিঙে কয় যে ভাৰতীয় সেনাই জম্মু-কাশ্মীৰৰ পৰা সন্ত্ৰাসবাদ নিঃশেষ কৰিব বুলি তেওঁৰ সম্পূৰ্ণ বিশ্বাস আছে । লগতে ভাৰতীয় নাগৰিকক আঘাত দিব পৰা কোনো ধৰণৰ “ভুল” নকৰিবলৈও তেওঁ সৈন্যবাহিনীক আহ্বান জনায়।
ইয়াৰ পূৰ্বে বুধবাৰে জম্মু-কাশ্মীৰত নিৰাপত্তা পৰিস্থিতিৰ পৰ্যালোচনাৰ বাবে উপস্থিত হোৱা সিঙে কয় যে জাতিৰ নিৰাপত্তাৰ প্ৰতি নিজৰ কৰ্তব্য পালন কৰাৰ সমান্তৰালভাৱে মানুহৰ হৃদয় জয় কৰাটো জোৱানসকলৰ দায়িত্ব । জম্মু-কাশ্মীৰৰ পুঞ্চ জিলাত সন্ত্ৰাসবাদীয়ে সেনাবাহিনীৰ বাহনত এম্বুছ কৰা স্থানৰ সমীপত যোৱা সপ্তাহত সন্দেহজনক পৰিস্থিতিত তিনিজন লোকক সন্দেহজনক পৰিস্থিতিত মৃত অৱস্থাত উদ্ধাৰ হোৱাৰ পিছতে সিঙৰ এই বক্তব্য প্ৰকাশ পাইছে।
বিষয়টোৰ গুৰুত্ব স্বীকাৰ কৰি সেনাই চলি থকা তদন্তৰ সৈতে সহযোগিতা আগবঢ়োৱাৰ কথা ঘোষণা কৰি সাধাৰণ নাগৰিকসকলৰ মৃত্যুৰ পৰিস্থিতিৰ ওপৰত নিজাববীয়াকৈ তদন্ত আৰম্ভ কৰিছে ।
ক্ৰমাৎ বৃদ্ধি পোৱা উত্তেজনা আৰু প্ৰতিবাদৰ ফলত ভাৰতীয় কৰ্তৃপক্ষই পুঞ্চ আৰু চুবুৰীয়া জিলাসমূহত মোবাইল ইণ্টাৰনেট সেৱা বন্ধ কৰাৰ সতৰ্কতামূলক ব্যৱস্থা গ্ৰহণ কৰিছে । ক্ৰমাৎ বৃদ্ধি পোৱা প্ৰতিবাদ নিয়ন্ত্ৰণ কৰা আৰু অঞ্চলটোত জনশৃংখলা বজাই ৰখাৰ বাবে এই পদক্ষেপ গ্ৰহণ কৰা হৈছে ।
কাশ্মীৰৰ এই মৰ্মান্তিক ঘটনাটো ভাৰত আৰু পাকিস্তানৰ মাজত চলি থকা সংঘাতৰ বাবে প্ৰচণ্ড সামৰিককৃত অঞ্চলৰ পটভূমিত সংঘটিত হয় । ভাৰতে দুয়োখনেই কাশ্মীৰক সম্পূৰ্ণৰূপে দাবী কৰে যদিও ইয়াৰ কিছু অংশহে ভাৰতৰ নিয়ন্ত্ৰণত আছে । উল্লেখযোগ্য যে কাশ্মীৰ তিনি দশকৰো অধিক সময় ধৰি বিচ্ছিন্নতাবাদী বিদ্ৰোহৰ থিয়েটাৰ হিচাপে পৰিগণিত হৈ আহিছে । ভাৰতে পাকিস্তানক এই অঞ্চলত হিংসাৰ উচটনি দিয়াৰ বাবে দোষাৰোপ কৰি আহিছে—এই দাবীক চুবুৰীয়া ৰাষ্ট্ৰই ধাৰাবাহিকভাৱে অস্বীকাৰ কৰি আহিছে যদিও কাশ্মিৰত মৃত্যু হোৱা বা সেনাৰ হাতত ধৰা পৰা উগ্ৰপন্থী সদায় পাকিস্থানৰ দ্বাৰা প্ৰশিক্ষিত আৰু প্ৰেৰিত বুলি অভিযোগ উঠি আহিছে । এই অভিযোগ পাকিস্তানে সম্পূৰ্ণৰূপে নাকচ কৰিব পৰা নাই ।
কাশ্মীৰ সংঘাতৰ ইতিহাসত নিৰাপত্তা বাহিনীৰ বিৰুদ্ধে মাৰপিট, নিৰ্যাতন, ন্যায় বহিৰ্ভূত হত্যাকে ধৰি মানৱ অধিকাৰ উলংঘাৰ অভিযোগ অন্তৰ্ভুক্ত কৰা হৈছে। সেনাৰ বাহনত আক্ৰমণৰ পিছত সাধাৰণ নাগৰিকক আটক কৰা এই কাণ্ডই অঞ্চলটোৰ জটিল আৰু স্পৰ্শকাতৰ গতিশীলতাক আৰু অধিক বৃদ্ধি কৰে। আনহাতে সামৰিক আৰু অৰ্ধ-সামৰিক বাবিনীৰ বহুলোক এই অশান্ত অঞ্চলত উগ্ৰপন্থীৰ আক্ৰমণৰ বলি মৃত্যুবৰণ কৰিব লগা হৈছে ।
প্ৰতিবাদী আন্দোলনৰ প্ৰতি সঁহাৰি জনাই আৰক্ষীয়ে অচিনাক্ত ব্যক্তিৰ বিৰুদ্ধে হত্যাৰ গোচৰ ৰুজু কৰাৰ বিপৰীতে ভাৰতীয় সেনাই এক বিবৃতিত তদন্তত সম্পূৰ্ণ সমৰ্থন আৰু সহযোগিতা আগবঢ়োৱাৰ প্ৰতিশ্ৰুতি প্ৰকাশ কৰিছে।
এই দুৰ্ভাগ্যজনক পৰিঘটনাবোৰে মৃত্যুৰ সম্যক আৰু ন্যায্য তদন্তৰ প্ৰয়োজনীয়তাৰ প্ৰতি দৃষ্টি আকৰ্ষণ কৰি ইতিমধ্যে কাশ্মীৰৰ জটিল পৰিস্থিতিত জটিলতাৰ আন এক স্তৰ সংযোজন কৰিছে।